Алматы облысындағы қоқыс полигоны әлі бықсып жанып жатыр

Қатты тұрмыстық қалдықтар полигоны 15 қыркүйектен бері өртеніп жатыр. Құтқарушылар күн сайын өртті сөндіру барысы жөнінде мәлімет беріп отыр. Алайда отты толықтай ауыздықтау әзірге мүмкін болмай тұр.

Orda.kz тілшісі оқиға орнына барып, жағдайды бақылады.

Бүгін полигонда ашық көзге түсетін жалын жоқ. Бірақ қоқыстың астыңғы қабаттары бықсып жанып жатыр.

Үйінділерді шаншып, су шашып, құм сеуіп т.б. шаралар жүріп жатыр. Төтенше жағдайға басқа өңірлерден де күш тартылған.

Жергілікті тұрғындар бастарының ауыратынын, түтіннен уланып жатқанын айтып жатыр. Алайда Іле ауданы әкімдігінің мәліметінше, ауруханаға ешкім жүгінбеген, ал ауа сынамалары «қалыпты деңгейде» көрсетіп отыр.

Түтін мен күйік иісі полигоннан шамамен 20 шақырым қашықтықтан айқын сезіледі. Жақындаған сайын аспан біртіндеп сұрланып, полигон үстін түтін тұмшалап тұрғаны көрінеді.

Полигон маңында ТЖМ лагері мен жылжымалы медицина пункті орналасқан.

Алатау ауданының әкімі Аркен Утенов те полигонға келді. Оның айтуынша, алғашқы екі тәулік бойы ол осында тәулік бойы жүрген. Өрттің бетін қайтарғаннан кейін үйіне қайтқанымен, жергілікті тұрғындармен байланысын үзбеген. Бағытын өзгерте беретін жел бір жағынан сөндіруге кедергі келтірсе, екінші жағынан ауаны тазартып тұр.

Әкімнің сөзіне сенсек, халыққа төнген қауіп жоқ.