Алматы облысындағы білім бөлімінің басшысы 680 млн теңге жымқырғаны үшін қамауға алынды

Алматыда Антикор қызметі «Алматы облысы Іле аудандық білім бөлімі» мемлекеттік мекемесі басшысына қатысты сотқа дейінгі тергеу амалдарын жүргізуде, деп хабарлайды Orda.kz порталы.

«Күдікті Іле ауданындағы жалпы білім беретін мектептерде іс жүзінде жұмыс істемейтін тұлғалардың жалақысынан өндіріп алу мақсатында, бір топ тұлғалармен алдын ала сөз байласу арқылы 680 миллион теңге көлемінде бюджет қаражатын жымқырды. Сонымен қатар өзінің қызметтік өкілеттігін асыра пайдаланып, бюджет қаражатын ұрлады деген күдікке ілінді. Жүргізушісін жалған түрде мектеп-гимназиясына кәсіптік бағдар беру жөніндегі кеңесші қызметіне орналастырған. Оған жалпы сомасы 4,9 млн теңге заңсыз жалақы төленген» деп хабарлады Антикор.

Сот санкциясымен басшы қамауға алынды. Тергеу жалғасып жатыр. Қылмыстық іс жүргізу кодексінің 201-бабына сәйкес, тергеу мүддесін көздейтін өзге мәліметтерді таратуға болмайды.