Алматы облысында зейнеткер өз баласын өлтірмекші болған

Алматы облысының полицейлері өз ұлын өлтірмек болды деген күдікпен 71 жастағы зейнеткерді ұстады. Қарт жасының ұлғаюына байланысты тергеу кезінде үйқамаққа алынды.

9 наурыз күні Алматыдағы ауруханалардың біріне Талғар ауданы Бесағаш ауылының 44 жастағы тұрғыны пышақ жарақатымен жеткізілген. Белгілі болғандай, жәбірленушіге отбасындағы жанжал кезінде қарт әкесі жарақат cалған. Зардап шегуші әлі де дәрігерлердің қатаң бақылауында.

«71 жастағы күдікті ұсталып, уақытша ұстау изоляторына қамалды. Бірақ ол кісінің жасы ұлғайғанын және басқа да мән-жайларды, сондай-ақ, зейнеткерге қатысты берілген арызды ескере отырып, «үйқамақ» түріндегі бұлтартпау шарасы таңдалды» деп хабарлады Талғар аудандық полициясы.

Күдікті өз айғағында ұлына асхана пышағымен шынымен де бірнеше рет пышақ сұққанын мойындады. Аталған факті бойынша ҚР Қылмыстық кодексінің «Адам өлтіруге оқталу» бабы бойынша сотқа дейінгі тергеу амалдары жүргізілуде.