Алматы облысында ұрланған қарудың тағы бір қоймасы табылды

Алматы облысында ұрланған қарудың тағы бір қоймасы анықталды, деп хабарлайды Алматы облысы ІІД бастығының тергеу жөніндегі орынбасары Рустам Әбдірахманов.

— Жамбыл ауданы Ұзынағаш ауылының шетінде орналасқан қолдан жасалған  қоймадан оқ-дәрілері бар атыс қаруы табылды. Атап айтқанда, Калашников автоматы (АК) негізіндегі аңшылық карабин және 58 патрон, - деді Әбдірахманов.

Аталған дерек Қазақстан Республикасы Қылмыстық кодексінің 287-бабы, 3-бөлігі бойынша Жамбыл аудандық  ТЖД ОП-на тіркелді.

— Тәркіленген атыс қаруының нақты кімдікі  екені сот-баллистикалық сараптама арқылы анықталады, - деп түсіндірді полиция бастығының орынбасары.

Еске салсақ, бұған дейін 2 желтоқсанда Талғар ауданындағы бау-бақша серіктестіктерінің бірінің аумағынан ҰҚК-нің көмегімен 16 калибрлі екі қос ауызды кесілген шолақ мылтығын, Remington model 700 аңшы мылтығын, пневматикалық тапанша және сауыт, 115 патрон тапқан болатын.

Барлық алынған қарулар сот-баллистикалық сараптамаға жіберілді.