Алматы облысында тойдың арты адам өлімімен аяқталды

Алматы облысының Ұйғыр ауданында үйлену тойы кезінде төбелес шығып, артынша жас жігіт көз жұмды.

12 желтоқсан орталық аудандық ауруханадан Ұйғыр облыстық полиция басқармасының кезекші бөліміне пышақ жарақатынан қайтыс болған Шарын ауылының 26 ​​жастағы тұрғыны жеткізілгені туралы хабарлама келіп түсті. Аталған факті сотқа дейінгі тергеулердің бірыңғай тізіліміне «Кісі өлтіру» бабы бойынша тіркелді.

Оқиға орнына барған жедел-тергеу тобы Шарын ауылындағы жергілікті мейрамханада той кезінде қонақтар арасында кикілжің орын алып, оның соңы жанжалға ұласқанын анықтады.

«Нәтижесінде 26 жастағы тұрғын пышақты ауылдасының кеуде тұсынан сұғып алған. Жарақаттан жас жігіт көз жұмған. Қылмыс құралы табылып, заттай айғақ ретінде қылмыстық іс материалдарына енгізілді» деп хабарлады Алматы облысы ІІД баспасөз қызметі.

Ұсталған азамат уақытша ұстау изоляторына қамалды. Күдіктінің айтуынша, ол тойда алкогольді ішімдік ішкен.

«Таныстарының жанжалын көрген ол үнемі өзімен бірге алып жүретін жиналмалы пышағын суырып алып, жанжалдасып жүргендерге қарай бет алған. Жәбірленуші оны тоқтатуға тырысқан. Ол ашуланып, жігіттің жүрегіне пышақ сұғып алған. Күдікті істеген ісіне өкініп отыр» деді полиция.

Тергеу судьясы сотқа дейінгі тергеп-тексеру кезеңінде ұсталғанға екі айға қамауға алу түріндегі бұлтартпау шарасы ретінде санкция берді. Тергеу мүддесі үшін басқа мәліметтер жарияланбады.