Алматы облысында тасқын су салдарынан жол бұзылды

Алматы облысында толассыз жауған бұршақ жаңбыр баурайларды ағын суға толтырды, деп хабарлайды Orda.kz. облыстық ТЖД баспасөз қызметіне сілтеме жасап.

Кеген ауданы Саты ауылында үздіксіз жауған бұршақ жаңбыр салдарынан еңіске аққан су  тасқыны таулы аймақтағы жолды зақымдады.

«6 шілде күні сағат 18:35-те Алматы облысы Төтенше жағдайлар департаментінің кезекші бөліміне нөсер жаңбыр салдарынан Саты ауылы маңындағы  «Саты сайы»  шатқалындағы (таулы аймақ) жергілікті маңызы бар жолды су шайып жатқаны туралы хабарлама келіп түсті»  делінген хабарламада.

Жол төсемі бұзылып, 300 метрдей жер опырылып кеткен. Дегенмен жолшылар әзірге өтетін өткел барын нақтылап отыр. Жол қызметі тұрғындарға қауіп туралы СМС хабарламалар жіберген.

«Жол бөлігін жөндеу-қалпына келтіру жұмыстары комиссия қорытындысынан кейін және жолдың бүлінген бөлігін қалпына келтіру үшін мердігер таңдалғаннан кейін жүргізіледі. Оқиға орнына Алматы облысының Төтенше жағдайлар департаменті (3 қызметкер, 1 техника), «Қазселденқорғау» ММ (2 жұмысшы және 1 техника), жергілікті атқарушы органдар (3 жұмысшы және 1 техника) шықты» деп хабарлайды Төтенше жағдайлар департаментінің баспасөз қызметі.

Төтенше жағдайлар департаменті баспасөз қызметінің хабарлауынша, оқиға салдарынан  зардап шеккендер жоқ.