Алматы облысында танымал блогер бас бостандығынан айрылды

Алматы облысында блогер алаяқтық жасап, бопсалағаны үшін 3,5 жылға бас бостандығынан айырылды, - деп хабарлайды Polisia.kz.

Соңғы бірнеше айда Еңбекшіқазақ өңірінде тергеу жүргізіліп, сот процесі өткен. Іс материалдарында жауапкер ретінде әлеуметтік желілердегі парақшаларында  бірнеше мыңдаған  жазылушысы бар Шелек ауылында тұратын  жас келіншек тартылған.

Тергеу дәлелдегендей, пандемия кезінде блогер ауылдағы дәмханалардың бірінің әкімшісін бизнеске зиянын тигізетін ақпарат таратамын деп қорқытып, одан ай сайын 20 мың теңгеге жуық ақшаны заңсыз алып отырған.

Еңбекшіқазақ аудандық № 2 сотының қаулысымен сотталушы ҚР ҚК-нің 194-бабы «Бопсалау» және ҚР ҚК-нің 190-бабы «Алаяқтық» бойынша айыпты деп танылып, үкім шығарылды.

Танымал блогер 3 жыл 6 айға бас бостандығынан айрылды. Дегенмен сотталушының кәмелетке толмаған балалары ескеріліп, жазаны өтеу олар 14 жасқа толғанға дейін кейінге қалдырылды.