Алматы облысында төбелес арты атыспен аяқталды

Алматы облысы Қарасай ауданы Шамалған ауылы маңында атыс орын алды. Қазір осы факті бұзақылық ретінде тексеріліп жатыр.

«ҚР Қылмыстық кодексінің 293-бабы (бұзақылық) бойынша қылмыстық іс қозғалды. Қазіргі уақытта оқиғаға қатысқандардың барлығын ұстап, учаскелік полицияға жеткізуге бағытталған іздестіру шаралары ұйымдастырылуда. Жедел жағдай бақылауда» деп хабарлады ҚазТАГ агенттігіне Алматы облысының полиция департаментінің баспасөз қызметі.

Оқиға 7 наурыз күні орын алған.

«Полицияға Шамалған ауылының маңында бір топ ауыл тұрғындарының (30-ға жуық адам) төбелес шығарып, артынша атыс дыбысы естілгені туралы хабарлама түсті. Оқиға орнынан оқ жарақатымен 30 жастағы ер адам табылып, дереу ауруханаға жеткізілді. Әртүрлі калибрлі мылтықтардың оқпандары мен патрондары, сондай-ақ екі Lexus және ВАЗ көлігі табылды. Қақтығысқа екі ауылдық округтің тұрғындары, негізінен 25-30 жас аралығындағы ауыл жастары қатысқаны алдын ала анықталды. Оқиғаға не себеп болғаны әлі тексеріліп жатыр» деп қосты полиция.

Еске салсақ, бұған дейін Telegram арналар Шамалған маңында атыс болғанын хабарлаған. Бір нұсқа бойынша қақтығысқа Қазақстанның тұңғыш президенті Нұрсұлтан Назарбаевтың отбасының жақын серіктерінің бірі, «Көпшік» лақап атымен танымал Бауыржан Көпжасаров қатысқан. Кейбір мәліметтерге қарағанда, қақтығысқа қатысушылар полицияға қарай оқ жаудырған.