Алматы облысында пара алған судьяға үкімі шықты

Алматы облысы Ұйғыр аудандық сотының судьясы Руслан Сүлейменов өмір бойына мемлекеттік қызметте лауазымды қызмет атқару құқығынан және тоғыз жылға бас бостандығынан айрылды.

Бұл туралы Orda.kz хабарлады.

Брифинг кезінде Сыбайлас жемқорлыққа қарсы іс-қимыл агенттігінің ерекше маңызды істер жөніндегі тергеушісі Данияр Биғайдаров пара алған судьяның үкімі туралы айтты.

Белгілі болғандай, үкімді 22 шілдеде Талдықорған қалалық соты шығарған.

Руслан Сүлейменов орман шаруашылығы директоры Юлдашевтан 12 млн теңге пара алды деген күдікке ілінді. Судья директорды ақша облыстық сотқа түседі және ақтау үкімі сақталады деп сендірді.

Алайда, облыстық сот шаруашылық директорын 8 жылға бас бостандығынан айырды. Сондай-ақ, Юлдашевтың қарамағындағылар пара алуға тырысқандығы үшін 7 жылға сотталды.

Үкім әлі заңды күшіне енген жоқ.