Алматы облысында Орталық Азиядағы алғашқы әлемдік деңгейдегі футбол академиясы салынып жатыр

Алматы облысында Орталық Азиядағы алғашқы футбол академиясы қолданыстағы «Ақбұлақ» спорттық орталығы базасында салынуда,  бұл әлемдік деңгейдегі футбол академиясы болады,  деп хабарлайды Orda.kz  облыс әкімдігінің баспасөз қызметіне сілтеп. 

Алматы облысының әкімі Марат Сұлтанғазиев жұмыс сапарымен Талғар ауданына барып, Atlético de Madrid Kazakhstan футбол академиясының құрылысымен танысты.

Академия – Еуропаның жетекші футбол клубтарының бірі қатысып жатқан Орталық Азиядағы алғашқы жоба болмақ. Жоба аясында балалар мен кәсіби командаларға арналған оқу-жаттығу базасы кезең-кезеңімен салынады.

Бірінші кезеңде балалар академиясы құрылады. Құрылыс жұмыстары 2025 жылдың мамыр айында басталды және 2026 жылдың соңына дейін аяқталады деп жоспарланған. Қазіргі уақытта қонақ үй корпусы күрделі жөндеуден өтіп, футбол алаңдарының бірі қайта жаңғыртылып жатыр. Алғашқы нысанды 30 маусымда пайдалануға беру көзделген.

Жоба аясында сондай-ақ әкімшілік-тұрмыстық кешен, жабық жаттығу залы, жасанды жабындысы бар ашық алаңдар мен қақпашыларға арналған жеке аймақ салу жоспарланған. Бұрынғы спорттық нысанның ғимараты өткізу пункті, күту залы және кафетерийі бар нысан ретінде қайта жабдықталады.

Екінші кезеңде кәсіби командаларға арналған инфрақұрылым – табиғи газон төселген алаңдар салынады. Жобаның соңғы кезеңінде 10 мың көрерменге арналған стадион бой көтереді.