Алматы облысында оқушылар арасында төбелес шықты

Алматы облысында мектеп оқушылары арасында төбелес шықты. Бұл оқиғаға қатысты облыстық полицейлер түсініктеме берді.

Әлеуметтік желіде жарияланған ақпаратқа сәйкес, тоғызыншы сыныпта оқитын баланы соққыға жыққан.

«Баланың ата-анасы ұстаздар бұл қылмысты жұртшылықтан жасырғысы келеді деп отыр. Оқушының сыныптастары «Жандос» есімді мектеп оқушысы балалар арасында үрей туғызып жатқанын айтты. Бала 6 желтоқсанға қараған түні Шелек ауруханасының жансақтау бөліміне жеткізілді» делінген хабарламада.

Жазба авторы Білім және ғылым министрлігінің басшысы Асхат Аймағамбетов пен Ішкі істер министрлігінің басшысы Ерлан Тұрғымбаевтан шара қолдануды өтінді.

Облыстық полиция департаменті оқиғаның 6 желтоқсанда №1 мектептің жанында орналасқан Еңбекшіқазақ ауданына қарасты «Рахат» саяжай қоғамы аумағында болғанын растады.

«Сағат 13:30-да сабақтан кейін аталған мектептің 10-11-сынып оқушылары арасында туындаған араздық салдарынан төбелес орын алған» деді Алматы облысы полиция департаментінің баспасөз қызметі.

Осы факті ҚР Қылмыстық кодексінің 293-бабы бойынша сотқа дейінгі тергеу амалдары басталды.

«Сот-медициналық сараптама тағайындалды, оның қорытындысы бойынша процессуалдық шешім қабылданады» деп қорытындылады Алматы облысы полиция департаментінің баспасөз қызметі.

Сондай-ақ, департамент қылмыстық істі тергеу аясында материалдар кәмелетке толмағандардың құқықтарын қорғау комиссиясына жіберілетінін атап өтті.