Алматы облысында мас әйел күйеуін пышақтап тастаған

Алматы облысы Қаратал ауданының Үштөбе қаласында мас әйел күйеуімен жанжалдасып қалған. 38 жастағы келіншек 41 жастағы күйеуіне ауыр жарақат салған.

Әйелдің үстінен қылмыстық іс қозғалды.

Қаратал ауданы полициясының кезекші бөліміне 41 жастағы ер адамның пышақ жарақатымен ауруханаға түскені хабарланған.

Белгілі болғандай, отбасында жанжал шыққан.

Күдіктінің айтуынша, ол мас болғандықтан, есінде ештеңе қалмаған. Келіншектің есінде тек оның күйеуінің достарына дастархан дайындағаны қалған.

«Қазір ҚР Қылмыстық кодексінің 24-бабының 3-бөлігі, 99-бабының 1-бөлігі кісі өлтіруге оқталу бойынша тергеу амалдары жүргізілуде. Оқиға болған жерді тексеру кезінде табылған асхана пышағы айғақ ретінде қылмыстық іс материалдарына тіркелді. Медициналық сараптамаға сәйкес, ұсталған кезде күдікті орташа дәрежедегі мас күйінде болған» деді полиция.

Ер адамға күрделі ота жасалып, жансақтау бөліміне жатқызылған. Қазір ол дәрігерлердің бақылауында.