Алматы облысында қоқыс полигонындағы өрт екінші күн қатарынан тоқтамай тұр

Алматы облысындағы қатты тұрмыстық қалдықтар тастайтын полигонда шыққан өртті сөндіру жұмыстары әлі де жалғасып жатыр, деп хабарлайды Orda.kz.

Бүгінгі таңда жеке учаскелерде 10 метр тереңдікке дейін бықсып жанып жатқан жерлер анықталды. Өрт ошақтарын сөндіру үшін инертті материалдар қолданылып, полигон аумағы арнайы соқамен жыртылды.

Сөндіру жұмыстары жеті учаскеде жүргізіліп жатыр. Бағыты қайта-қайта өзгеретін желден өртті өшіру қиындап тұр.

«Өртті сөндіру жұмыстарына Алматы облысы, Алматы қаласы ТЖД, ТЖМ 28237 әскери бөлімі, жергілікті атқарушы органдар, «Қазселденқорғау» және Алматы қаласы ТЖД Құтқару қызметінің 120-ға жуық адамы мен 60-тан астам техникасы жұмылдырылды» деп жазды ТЖД.

Суды үздіксіз жеткізу үшін Тереңқара өзеніне сорғы көлік орнатылып, диаметрі 77 мм болатын 70 су желісі жүргізілді. Оған 6 техника жұмылдырылды.