Алматы облысында бір отбасының үш бірдей мүшесі батпаққа батып кетті

Үштөбе тас жолында батпақта аударылып қалған көлік табылды.

Талдықорған – Үштөбе тас жолында жол апаты орын алып, көлік батпаққа төңкеріліп қалған. Көліктің ішінде бір отбасының үш бірдей мүшесі болған: әкесі, анасы және қызы. Олар оқиға орнында мерт болды.

15 қараша полицияға Алматы облысының 27 жастағы тұрғыны жүгінген. Ол туыстарымен байланысқа шыға алмай жатқанын айтқан. Ер адамның айтуынша, оның ата-анасы мен әпкесі 14 қараша күні кешке Алматыдан шығып, Талдықорғанға бет алған. Одан кейін байланысқа шықпаған.

Отбасының жоғалғаны туралы ақпарат түрлі әлеуметтік желілерде жарияланды.

«14 қарашада мемлекеттік нөмірі 167 KSY 05 «Skoda Superb» көлігінде үш адам Алматыдан Үштөбеге жолға шықты. Сағат 19:00-де Талдықорған аркасынан өткеннен кейін олар байланысқа шықпады» делінген желідегі жазбада.

Кейін көліктің батпақтан табылғаны анықталды.

Алматы облысының полиция департаментінде 15 қарашада Қаратал ауданының 27 жастағы тұрғынынан ата-анасы мен әпкесі өзінің Skoda Superb көлігімен жолға шығып, жоғалып кеткені туралы хабарлағанын айтты.

«Сол күні полиция қызметкерлері Талдықорған-Үштөбе тас жолында «Skoda Superb» көлігін тапты. Алдын ала мәлімет бойынша, 60 жастағы жүргізуші рөлді басқара алмай, көліктің аударылып кетуіне жол берген. Оқиға салдарынан жүргізуші мен оның 47 және 19 жастағы жолаушылары оқиға орнында көз жұмды. ҚР Қылмыстық кодексінің 345-бабының 4-бөлігі бойынша сотқа дейінгі тергеу басталды. Аталмыш жол-көлік оқиғасының барлық мән-жайын объективті түрде анықтауға бағытталған қажетті тергеу әрекеттері жүргізілуде» деп хабарлады Алматы облысы полиция департаментінің баспасөз қызметі.