Алматы облысында аштықтан қажыған бала табылды

Алматы облысының әкімі Марат Сұлтанғазиев аштықтан қажыған баланың қандай жағдайда өмір сүргенін айтты, деп хабарлайды Orda.kz.

«Біз жағдайды бақылап отырмыз. Ол алғашқы үш жылда кәдімгі бала сияқты дамыған. Кейіннен оның дамуы кешуілдеді. Бүгінде ол емделуде. Біз жұмыс істеп жатырмыз. Әрине, бұл баланың тұрмыс жағдайы өте нашар. Үйдің іші қаңырап, көп мысық ұстағандықтан иісі де мүңкіп тұр. Анасы балаға қарамаған. Ол бейтаныс адамдардан ғана емес, өз анасынанда қорқады. Онымен  дәрігерлер мен психологтар жұмыс жүргізуде», - деді ол Орталық коммуникациялар қызметінде журналистердің сауалдарына жауабында. 

Бұған дейін баланың Іле ауданынан табылғаны хабарланған болатын. Алты жасар бала аштықтан бұратылып, сөйлей алмай, жүре алмай қалған. Ол шұғыл түрде жергілікті ауруханаға жеткізіліп, екі өкпесінің де қабынғаны белгілі болды.

Кәмелетке толмаған баланы тәрбиелеу және (немесе) оқыту, құқықтары мен мүдделерін қорғау жөніндегі міндеттерді орындамағаны үшін баланың ата-анасы ҚР ӘҚБтК-нің 127-бабының 2-бөлігі бойынша әкімшілік жауапкершілікке тартылды.

Қорғаншылық және қамқоршылық органдары аталған тұлғалардың ата-ана құқықтарын шектеу туралы талаппен сотқа жүгінген.

Облыстық прокуратура осындай балаға дұрыс қарамаған отбасылардан шыққан 15 баланы анықтады.