Алматы облысында арықтаймын деген әйел көз жұмды

Құралай атты әйел Алматы қаласындағы пластика хирургиялық емханада іш майын отамен алдыртып, артынша қайтыс болды. 

Бұл туралы КТК телеарнасы хабарлады.

Алматы облысының тұрғыны, Құралай есімді 47 жастағы келіншек 5-6 кг тастап, арықтаймын деп хирургтың көмегіне жүгінеді. Құралай Алматы қаласындағы пластикалық хирургия емханасында іш майын отамен алдыртып, артынан көз жұмды. 

Хирургиялық операциядан кейін Құралай Батырханованың жағдайы нашарлап, жекеменшік клиникада жан тапсырды. Марқұмның жақындары болған іске дәрігерлерді кінәлап отыр. Туыстарының сөздерінше, медициналық мекемедегілер отаның соңы өлімге әкелуі мүмкін екенін ескертпеген.

Осылайша, әйел Алматыдағы атағы жер жаратын жекеменшік клиникаға жүгініп, ота арқылы денесіндегі майды алдыруды жөн санапты. Бұл үшін 2 миллион теңге де төлеп, 5 шілдеде ота жасатуға кеткен екен.

«Туған күніме жаңа Құралай болып келемін» деп, қуанып отаға кеткен еді. Мұғалім ғой, «27 шілдеде жұмысқа шығамын, отадан кейін 10-15 күн күтінемін» деп ойлады. Еш күмән болған жоқ, дәрігерге де күмәнданбадық. Клиника клиенттерінің пікірін қарасақ, Алматы бойынша «нөмірі бірінші» орталық екен», – деді марқұмның сіңілісі Сәулет Батырхан.

Әйел сол күні отадан кейін көз жұмған екен. 8 шілдеде туған күнін атап өткісі келген марқұм қуанышына бір тәулік жетпей қайтыс болды. Артында 3 баласы қалды.