Алматы облысында анасы сәбиімен қоса тірідей жанып кетті

Алматы облысының ТЖД мәліметінше, бүгін Іле ауданына қарасты Кенен Әзірбаев ауылы Егемен көшесінде үш бірдей жеке тұрғын үй мен оларға жалғасқан қора-қопсы өртенді. Өрттен анасы мен нәресте қайтыс болды, деп хабарлайды Orda.kz.

Алғашқы өрт сөндіру бригадалары жеткен сәтте тілсіз жау ашық жанып тұрған. Құтқарушылардың айтуынша, хабар тым кеш берілгендіктен, өрт тез тарап үлгерген. Төтенше жағдайды ауыздықтауға ауа райының ыстығы, қою түтін, сондай-ақ үйдің қамыс қапталған каркас қабырғалары кедергі келтірген. Бұған қоса, үйлердің бір-біріне тым жақын орналасқаны (ара қашықтығы небары 1,5–2 метр) және тар көшелер де қиындық туғызған.

Жалпы 448 шаршы метр аумақты шарпыған өртті сөндіру кезінде төрт газ баллоны қауіпсіз аймаққа шығарылды.

Тілсіз жаумен Алматы облысы және Алматы қаласының ТЖД күштері күресті. 18 қызметкер мен 6 арнайы техника тартылды.