Алматы облысында 20 жастағы жігіттен мефедронның үлкен партиясы табылды

Тінту кезінде жас жігіттің көлігінен есірткі салынған қара полиэтилен пакет табылды

Полицейлер Алматы облысы Қарасай ауданында 20 жастағы алматылық тұрғынның көлігін тоқтатты. Тексеру кезінде олардың назары лентаға оралған байламдары бар қара түсті полиэтилен пакетке түсіп, одан ұнтақ түріндегі зат табылды, деп хабарлайды жергілікті полиция қызметі.

Сот-химиялық сараптамасы анықталған заттың салмағы 9 келі болатын мефедрон екенін көрсетті.

«Аталмыш факті бойынша Қылмыстық кодекстің 297-бабы  3-бөлігінің 1.3-тармақтары (Есірткі құралдарын өткізу, жөнелту немесе өткізу мақсатында заңсыз дайындау, қайта өңдеу, иемдену, сақтау, тасымалдау, психотроптық заттар, олардың аналогтары» делінген полиция хабарламасында.

Күдікті қылмысын мойындады. Енді ол мүлкі тәркіленіп, 10 жылдан 15 жылға дейін бас бостандығынан айрылуы мүмкін.

Қазір қажетті сараптамалар тағайындалып, сотқа дейінгі тергеу амалдары жүргізілуде.