Алматы облысы Мәдениет басқармасының басшысы қаржы жымқырды деген күдікке ілінді

Сыбайлас жемқорлыққа қарсы қызмет Алматы облысы Мәдениет басқармасы басшысының ұсталғанын растады.

Әлия Жақыпбекова қолма-қол ақшаға айналдырып, өз қалауы бойынша пайдаланған бюджет қаражатын жымқырды деген күдікке ілінді, деп хабарлайды Orda.kz. тілшісі Антикорға сілтеме жасап.

Облыстық мәдениет басқармасының басшысы 30 сәуірде Іле аудандық тергеу сотының санкциясымен қамауға алынды. Сотқа дейінгі тергеу жалғасуда.

«ҚР Қылмыстық-процестік кодексінің 201-бабына сәйкес, тергеу мүддесін көздейтін өзге де ақпарат таратуға жатпайды. Конституцияның 77-бабының 3-тармағының 1-тармақшасына және Қылмыстық-процестік кодекстің 19-бабының 1-бөлігіне сәйкес, соттың заңды күшіне енген үкімімен оның қылмыстық құқық бұзушылық жасауға кінәсі анықталғанға дейін әркім кінәсіз деп танылады», - деп қосты Антикор.

Еске салайық, бұған дейін Orda.kz. тілшісі өз ақпарат көздеріне сілтеме жасай отырып, Алматы облысы Мәдениет, мұрағаттар және құжаттама басқармасының басшысын сыбайлас жемқорлыққа қарсы қызмет қызметкерлері ұстағанын хабарлаған болатын.