Алматы-Нұр-Сұлтан рейсінің қозғалтқышына құстар кептеліп қалды

Алматы-Нұр-Сұлтан рейсі бойынша ұшқан ұшақтың екі қозғалтқышына да құстар соғылып, кептеліп қалған. Оқиға қонуға жақындағанда болды, сондықтан да ешкім зардап шеккен жоқ.

Экипаждың айтуынша, қонуға жақындаған кезінде құстар екі қозғалтқышқа да соғылып, арасына кіріп кеткен.

«28 тамыздан 29 тамызға қараған түні Airbus A320 ұшағы KS955 Алматы-Нұр-Сұлтан рейсін орындады. Қону қалыпты режимде өтті. Ұшудан кейінгі тексеру қозғалтқыштарға құстардың кіріп кеткенін растады» делінген «Эйр Астана» хабарламасында.

Өткен сенбіде құстар  Алматыға ұшып бара жатқан ұшақтың қақпағын да зақымдаған. Нұр-Сұлтан-Алматы бағыты бойынша KS9960 рейсін орындағаннан кейін Airbus A321LR ұшағын тексеру барысында қызметкерлер клапанға соғылған құс іздерін тапқан. Бөлігінде сызат болған. Ұшақты жөндеумен инженерлік-техникалық бөлімнің жеке құрамы айналысады.