Тәуелсіздіктің 30 жылдығында тұңғыш президент күні мен Алматы метрополитенінің 10 жылдығы қарсаңында 8 жаңа электр жылжымалы поездары пайдалануға берілді.
– Осыдан он жыл бұрын, 2011 жылдың 1 желтоқсанында тұңғыш Президент – Елбасы Нұрсұлтан Назарбаев Қазақстандағы тұңғыш әрі жалғыз метрополитенді ашып, алғашқы жолаушы атанды. Содан бері метроның жұмысы бір минут та тоқтаған жоқ, – деп атап өтті Алматы әкімдігі.
Жаңа пойыздардың ұзындығы 77,8 м, максималды техникалық жылдамдығы 90 км/сағ. Температура диапазоны: -35, +40 градус Цельсий. Төрт вагондық пойыздың жолаушылар сыйымдылығы 940 адамды құрайды. Әрбір вагон жылыту, желдету және ауаны баптау жүйесімен, жолаушылар салоны флуоресцентті жарықтандыруымен жабдықталған.
Сондай-ақ ішкі және сыртқы бейнебақылау жүйесімен жабдықталған. Жүргізуші бейнебақылау жүйесінің мониторы арқылы кабинадан көліктердің ішіндегі және сыртындағы жағдайды бақылай алады.
Барлық вагондар жолаушыларға бір вагоннан екінші вагонға қауіпсіз және ыңғайлы өтуін қамтамасыз ететін, аралық есіктері жоқ кең ашық типті вагон аралық өтпелердің көмегімен біріктірілген.
Оңтүстік Кореяның Hyundai Rotem компаниясы шығарған вагондар Алматы метросына арнайы жасалған. Бүгінгі таңда 15 метро пойызы жұмыс істейді. 10 жылдан бері метро өзіне жүктелген міндеттерді орындап, тұрақты жұмыс істеп келеді.
