Алматы метросында пранк жасаған үш жігіт жауапқа тартылды

Алматы метросының жолаушыларына пранк жасап, музыканы дауысын тым жоғары қосқан үш жігіт жауапқа тартылды.

Polisia.kz хабарлағандай, метрополитендегі полиция басқармасының мәліметінше, үш жас жігіт Алматы метросының жолаушыларына пранк жасаған. Олар музыкалық дауыс күшейткіштің көмегімен әуенді қатты қойып, азаматтардың наразылығына назар аудармай отырған.

– Кейбір жолаушылар әуеннің кенеттен ойнағанын күтпегендіктен, қорыққан. Олардың бірі «Жібек жолы» бекетінде қызмет ететін полиция қызметкерлерінен көмек сұрады. Қоғамдық тәртіпті бұзғандар инспектордың заңды талаптарына қарсылық танытты.

19 және 22 жастағы А., К. және А.есімді азаматтардың әрекеттері ҚР ӘҚбК-нің 434-бабы (Ұсақ бұзақылық) бойынша тіркелген. Әкімшілік істің материалдары жинақталып, шешім қабылдау үшін сотқа жіберілді, – деді Метрополитендегі ПБ бастығының орынбасары Қайрат Жұрынов.