Алматы метросы қара түтінге оранды

Алматы метросындағы стансалардың бірінде пойыздың тежегіші қызып, түтіндей бастады.

Әлеуметтік желілерде осы оқиғаның бейнежазбасы пайда болды. Кадрлардан «Алатау» стансасындағы тоннельден түтін шыққаны көрініп тұр. Адамдар тоқтаған пойыздан шығып, метро қызметкерлері төтенше жағдай орнына асығуда.

Қалалық метрополитеннің баспасөз қызметі хабарлағандай, оқыс оқиға кезінде қосымша тежегіш автоматты түрде іске қосылған.

«Қазіргі уақытта нақты себеп анықталуда, вагон жұмыс кестесінен шығарылып, ақаудың нақты себебін анықтау мақсатында электродепоға жіберілді» делінген ведомства хабарламасында.

Сонымен қатар қалалық метрополитен баспасөз қызметі қозғалыс кестесінде ешқандай ауытқулар болмайтынын, метро қалыпты режимде жұмыс істейтінін жеткізді.

Алматы қаласы төтенше жағдайлар департаменті 101 пультіне ақпарат түспегенін, өрт сөндіру жасақтары шықпағанын алға татрты.