Алматы метросы 17 қаңтардан бастап жұмысын жалғастырады

Пойыздар 07:00-ден 21:00-ге дейін жүретін болады.

Алматы метросы 17 қаңтардан бастап жолаушылар үшін ашық. Жұмыс уақыты 07:00-ден 21:00-ге дейін, деп хабарлайды ORDA.KZ қалалық ұтқырлық басқармасына сілтеме жасап.

 «Пойыздар  аралығы қарбалас уақытта 10 минут, басқа уақытта 13 минут болады. Алдағы уақытта метроның жүру кестесіндегі өзгерістер қосымша хабарланады» деп атап өтті ведомстводан.

Сондай-ақ, 17 қаңтардан бастап қаладағы қоғамдық көліктер, оның ішінде троллейбустар мен қала маңындағы маршруттар сағат 21:00-ге дейін жүреді. Осылайша, қалалық маршруттар кестесі 08:00-ден 21:00-ге дейін, қала маңындағы маршруттар - 09:00-ден 21:00-ге дейін жүретін болады.

Еске салайық, Алматыда қоғамдық көліктердің жұмысы тәртіпсіздіктерден кейін 10 қаңтарда қайта жанданған болатын.