Алматы мен Түркістанда ДАИШ пен Хизб-ут-Тахрир әл-Исламидің жақтастары ұсталды

Алматы мен Түркістанда терроризмді насихаттады деген күдікпен Қазақстанда тыйым салынған ДАИШ және Хизб-ут-Тахрир әл-Ислами ұйымдарының ықтимал жақтастары ұсталды.

Бұл туралы Ішкі істер министрлігінің ресми интернет-ресурсы хабарлады.

«Алматы полиция департаменті Ұлттық қауіпсіздік комитетінің көмегімен лаңкестік идеяларды насихаттады деген күдіктіні ұстады. Ұсталған азаматтың Қазақстан Республикасында тыйым салынған «Хизб-ут-Тахрир әл-Ислами» діни-экстремистік ұйымының ізбасары екені атап өтілген. Сонымен қатар, Түркістанда облыстық полиция департаментінің қызметкерлері прокуратурамен келісе отырып, лаңкестік идеяларды насихаттады деген күдікпен жергілікті тұрғынды ұстады. Ер адам Қазақстанда сот шешімімен тыйым салынған ДАИШ халықаралық лаңкестік ұйымының идеологиясын ұстанушы» делінген хабарламада.

Ішкі істер министрлігінің мәліметінше, екі күдіктінің де тұрғылықты жерінде жүргізілген тінту кезінде діни әдебиеттер мен басқа да заттай айғақтар тәркіленді.

ҚР Қылмыстық кодексі 256-бабының 1-бөлігі (терроризмді насихаттау немесе терроризм актісін жасауға жария шақыру) бойынша сотқа дейінгі тергеу амалдары жүргізілуде.

«Тергеу барысында ұсталғандарға қатысты қамауға алу түріндегі бұлтартпау шарасы таңдалды» делінген хабарламада.