Алматы мәйітханасынан тәртіпсіздік кезінде қаза тапқандардың 41 денесі ұрланды

Алматы мәйітханасынан лаңкестік кезінде қаза тапқан адамдардың 41 мәйіті ұрланды.

Бұл туралы Орталық коммуникациялар қызметінде өткен брифинг барысында қалалық полиция департаментінің бастығы Қанат Таймерденов айтты.

– Шабуылдарды қару-жарақты, ұрыс әдістерін жетік меңгерген кәсіби дайындалған адамдар жүргізді. Жағдай кезінде қаза тапқандар мен жарақат алғандарды шабуылшылар өздерімен бірге алып кетті. Сол күндері мәйітханаға жеті шабуыл жасалып, қайтыс болғандардың 41 денесін белгісіз адамдар ұрлап әкетті, – деді ол.

Таймерденов сонымен бірге шабуылдаушылар 5 қаңтар күні кешке шабуыл жасалған полиция департаменті ғимаратынан қаза тапқандардың денелерін алып кеткенін айтты.

Полиция бастығы қазір қаланың мәйітханаларында қаза тапқан шабуылдаушылардың денелері бар-жоғын нақтылаған жоқ.

Бір күн бұрын Денсаулық сақтау министрлігінің қоғаммен байланыс департаментінің директоры Әсел Артакшинова шабуылшылар ем алғаннан кейін «қарулы адамдармен бірге ауруханалардан кетті, олар тіпті жансақтау бөлімнен де кетті» деп мәлімдеді.

Таймерденов оқиғалардың хронологиясын қалпына келтіре отырып, 5 қаңтар күні таңертең «бір мезетте түрлі аудандар мен шет аймақтардан» Алматы орталығына «20 мыңдық тобыр кіргенін» мәлімдеді. Олар полиция қызметкерлерінің қорғаныс сызықтарын бұзып, Республика алаңына келіп, әкімдікті басып алуға әрекет жасады.

– Әкімдікте адамдардың шектеулі кеңістігі мен тығыздығын ескере отырып, полицейлер қару қолданбаған, себебі ол адам шығынына алып келуі мүмкін. Осыған байланысты полиция қару қолданбай шегінуге мәжбүр болды. Шабуылшылар әкімдікті тонап, мүлікті өртеу арқылы қирата бастады, – деп толықтырды Таймерденов.

Ол сонымен бірге шабуылдың ұйымдастырылуы мен келісілуі туралы тұжырымды қайталап, қару-жарақ дүкендері «бір уақытта» тонады деп мәлімдеді. Оның мәліметінше, Алматыда 1347 қару, оның ішінде 501 ойық, 807 тегіс ұңғылы және 39 газ травматикалық қару ұрланған.

Алматыда тәртіпсіздік барысында 149 азамат пен 11 қауіпсіздік қызметкері қаза тапты, деп хабарлады қала полициясының басшысы.