Алматы мұғалімдерінің жалақысын көтеруге 30,8 млрд теңге бөлінді

Мемлекет басшысы Қасым.-Жомарт Тоқаевтың тапсырмасына сәйкес, ағымдағы жылы мұғалімдердің жалақысы 25%-ға өсті.

Жалпы төрт жыл ішінде мұғалімдердің жалақысы екі есеге артпақшы. Бірінші өсім 2020 жылдың 1 қаңтарында болды. Бұл шара аясында мектеп мұғалімдері, балабақша тәрбиешілері, колледждер, қосымша білім беру жүйесі қамтылды.

2021 жылдың нақтыланған бюджеті аясында Алматы мұғалімдерінің жалақысын 25%-ға көтеру үшін республикалық бюджеттен 30,8 млрд теңге бөлінді. Мегаполистегі мемлекеттік мекемелерде; мектептер мен колледждерде, балабақшалар мен интернаттарда, мектептен тыс ұйымдарда 32 мың педагогикалық қызметкер жұмыс істейді.

Бұлардан өзге, сынып жетекшілігі, дәптер тексеру, педагогикалық шеберлік, магистр дәрежесі және тәлімгерлік үшін қосымша ақылар қарастырылған. Айта кетерлігі, бұрындары магистр дәрежесі және тәлімгерлік үшін қосымша ақы төлеу болмаған, олар бірінші рет енгізіліп отыр, ал бұрыннан бар сынып жетекшілігі, дәптерлерді тексерудің қосымша ақылары екі есе өсуде.