Алматы – Куала-Лумпур тікелей рейсі ашылады

Наурыз айында Алматыдан Куала-Лумпурға тікелей рейстер ашылады деп жоспарланып отыр.

Бұл туралы қала әкімінің баспасөз қызметі хабарлады.

«Алматыға шетелдік туристер ағыны деңгейіне әсер ететін факторлардың бірі – жұмыс істейтін әуе қатынасының саны. Алматы қалалық туризм басқармасының басшысы Ғалия Тоқсейітова атап өткендей, бүгінде мегаполис әлемнің 82 елімен 42 тікелей бағыт және визасыз режим арқылы байланысады. Наурыз айында Алматы мен Куала-Лумпур арасында тікелей әуе қатынасын ашу жоспарлануда» делінген хабарламада.

Сондай-ақ, Тоқсейітованың айтуынша, елімізге келетін туристер санын арттырып, туризмді дамытудың негізгі факторларының бірі Алматы халықаралық әуежайындағы жаңа терминал құрылысының биылғы жылдың маусым айында аяқталуы.

«Әуежайдың жалпы өткізу қабілеті жылына 14 миллион жолаушыға жетеді. Осылайша, болжам бойынша 2024 жылы шетелдік туристер саны 520 мың адамға жетеді» деп қосты қала әкімдігі.