Алматы көшелерінде автобустар не үшін қаңтарылып тұр?

Алматының бірнеше көшесінде оншақты автобус қаз-қатар тізіліп тұр. Қала тұрғындары әлеуметтік желілерде видео мен фотолар жариялап, себебін сұрап жатыр. Жағдайға қала әкімдігі түсініктеме берді, деп хабарлайды Orda.kz.       

Әлеуметтік желілерде Жароков көшесінен Розыбақиев көшесіне дейінгі Өтепов көшесінің бойында тізіліп тұрған автобус тізбегінің фотосы тарады. Жазба авторларының бірі Алматы әкімдігінен қоғамдық көліктің неге түнде автопаркте емес, осы жерде тұрғанын түсіндіруді сұраған.

«Өтепов көшесіндегі бұл өздігінен пайда болған автопарк пе? Жароковтан Розыбақиевке дейін бірнеше айдан бері автобустар түнде осында қойылады. Неге олар автопаркте емес?»  деп жазды автор. 

Кейбір тұрғындар мұндай жағдай бірнеше айдан бері жалғасып келе жатқанын айтады. Ұқсас мәселе Райымбек даңғылы маңында да байқалған. Олардың айтуынша, «Гүлдер» тұрғын үй кешенінен Момышұлы көшесіне дейін автобустар жол жиегінде тізіліп тұрады.

Пікірлерде қолданушылар әртүрлі болжам айтқан, соның ішінде қоғамдық көлікке арналған газ құю бекеттерінің жетіспеуі себеп болуы мүмкін деген де пікір бар.

Сонымен қатар, тұрғындар автобустардың ұзақ уақыт бойы бос тұруы маршрут жұмысына әсер ете ме деген сұрақ қойған.

Осыған орай «Алматыэлектротранс» компаниясы мәлімдеме жасап, автобустар газ құю бекеттеріндегі техникалық ақауларға байланысты кезекте тұрғанын айтты.

«Автобус парктеріне қызмет көрсететін газ құю станцияларындағы техникалық ақауларға байланысты қазіргі уақытта автобустарды жанармай құю кезінде кезек байқалуда»,  деп хабарлады компания. 

«Алматыэлектротранс» жөндеу жұмыстары 30 шілдеде аяқталады деп жоспарланып отырғанын мәлімдеді.

Компания қозғалыс кестесінде уақытша ауытқу болуы мүмкін екенін ескертті.

«30 шілдеге дейін желіде автобустардың кешігуі және қозғалыс кестесінен аздаған ауытқулар болуы мүмкін. Келтірілген қолайсыздықтар үшін кешірім сұраймыз және жолаушыларға түсіністік танытқандары үшін алғыс білдіреміз» деп жазылған хабарламада. 

Алматы әкімдігі қазіргі уақытта кейбір автобус маршруттарында уақытша кідірістер болуы мүмкін екенін хабарлады.

Баспасөз қызметінің мәліметінше, қазір 8 автогаз толтыру компрессорлық станциясының (АГТКС) тек 5-еуі ғана қалыпты режимде жұмыс істеп тұр.

«Осыған байланысты жұмыс істеп тұрған газ құю станцияларында автобустар кезегі пайда болды. Қазіргі уақытта жөндеу-қалпына келтіру жұмыстары жүргізілуде. Бір станцияны 29 шілдеде іске қосу, ал барлық АГТКС жұмысын толық қалпына келтіру 31 шілдеге дейін жоспарланған»,  деп мәлімдеді әкімдік өкілдері. 

Әкімдік тұрғындардан келтірілген қолайсыздықтар үшін кешірім сұрап, жолаушыларды кестедегі ықтимал өзгерістерді ескеруге шақырды.

Оқи отырыңыз:

• Алматы маңында жер сілкінді
• Тәжікстанда қара хиджабқа тыйым салынып, сақалдыларға бақылау күшейді