Алматы: қоғамдық көліктердің бірінде ер адам жолаушыларды пышақпен қорқытқан

Алматыда қоғамдық көліктердің бірінде ер адам жолаушыларды пышақпен қорқытқан. Куәгерлер әлеуметтік желілерге бейнежазба жариялады. 

Бейнежазбадан жолаушылардың үрейленгенін байқауға болады. Кейбір жолаушылар жүргізушіден есікті ашуды сұраған. 

«Жүргізуші жолдың ортасында тоқтай алмады, өйткені ол жол-көлік оқиғасын тудыруы мүмкін. Аялдамаға жеткенде ғана есікті ашты» деп жазды куәгерлердің бірі.

Жолаушылардың бірі ер адамнан пышағын алуға тырысқан, бірақ бұл әрекет сәтсіз болды. Алматы полиция департаменті ер адамның жеке басы анықталғанын айтты. Сондай-ақ оның психикалық денсаулық орталығында есепте тұратыны анықталған.