Алматының жаңа әкімі қаңтар оқиғасы құрбандарын еске алды

Алматы қаласының жаңа әкімі Ерболат Досаев оңтүстік астанадағы мешіттердің бірінде қаңтар оқиғасы құрбандарын  еске алып, дұға жасады.

Қайғылы қаңтар оқиғасына 40 күн өтті және қазақстандықтар тәртіпсіздіктер мен лаңкестік әрекеттер кезінде қаза тапқан жерлестерін еске алуда.

Бұған дейін Қазақстан Президенті Қасым-Жомарт Тоқаев елордадағы «Хазірет Сұлтан» мешітінде қаза болғандарды еске алу рәсіміне қатысқандығын хабарлаған болатынбыз.

«Бүгін таңғы сағат 8-де Алатаудың басын мұнар, бауырын өрт шалған осы қасіретті оқиғаның Қырық күндігіне байланысты Алматы қаласындағы Орталық мешітте әруақтарға бағыштап Құран оқылып, елдің ертеңі үшін тілек тілеп, Жаратқанға салауат айтылыпты.

Шаһардың жаңа басшысы Ерболат Досаев Қырық күндікке арнап әруақтардың рухына Құран бағыштап, тірілердің тіршілігі үшін құрбан шалыпты, ниет қабыл болсын!

Сұраған тілектер мен көтерілген білектерге ел Ағалары, көрнекті тұлғалар - Нұрлан Оразалин, Смағұл Елубай, Рахман Алшанов бата беріпті. Әлгінде Алматыдағы ардақты ағамыз Нұрлан Мырқасымұлына хабарласып, амандасқанда осындай имандылықтың ізгі амалдары жасалғанын айтты. «Құдайсыз қурай сынбайды»  дейді. Қиын уақытта қала басшылығына келген Азаматтың елге көңіл-қош білдіріп, аруақтарға тағзым жасағаны ғой» деп жазды Жанарбек Әшімжан өзінің фейсбук парақшасында.

5 қаңтарда Алматыда жаппай тәртіпсіздіктер болды. Қалалық полицияның мәліметінше, бұл оқиғалар кезінде 149 адам қаза тапқан, оның 11-і тәртіп сақшылары.