Алматы әкімдігі: Таугүлдегі колледж құрылысы стадион аумағына әсер етпейді

Тұрғындар наразылығынан кейін Таугүл ықшамауданындағы №2  Алматы мемлекеттік гуманитарлық-педагогикалық колледжін кеңейту құрылысы жобасына түзету енгізу туралы шешім қабылданды.

Бұл туралы Orda.kz. хабарлады.

Алматы қаласы Білім және жайлы қалалық орта басқармасы стадионның қауіпсіздігіне қатысты алаңдаушылық білдірген тұрғындардың пікірін ескере отырып, мамандармен және тұрғындармен бірқатар кеңестер мен кездесулер өткізілгенін жеткізді.

— Педагогикалық колледждің әлеуетін шұғыл кеңейту қажеттілігін, сондай-ақ жақын маңдағы тұрғындардың мүдделерін ескере отырып, келесі шешім ұсынылды: колледж аумағында жаңа ғимарат құрылысы қолданыстағы стадион аумағына әсер етпейтін болады, - делінген министрліктің хабарламасында.

Басқарма қала тұрғындары үшін демалыс пен пайдалы уақыт өткізуге қолайлы жағдайлар жасау үшін стадион аумағы ретке келтіріледі деп сендірді.

— Абаттандыру жобасы қала тұрғындарының пікірін ескере отырып әзірленеді. Тұрғындардың стадион аумағына кіруі  ақысыз күйінде қалады, - деп толықтырды баспасөз қызметі.

Еске салсақ, Алматыдағы Таугүл шағынауданының тұрғындары №2 Алматы мемлекеттік гуманитарлық-педагогикалық колледжіне қосымша ғимараттың салынуына қарсылық білдірген болатын.