Алматы қаласының қоғамдық көліктері неге кестеден қалып жатыр?

11 қазан күні Алматы қаласындағы аялдамалардың бірінде қоғамдық көлік күткен адамдардың жиналып тұрған видеосы желіде тарады. Желі қолданушылары аталған оқиғаға наразы пікір білдіріп кінәлі тарапты іздеп жатты.

Бірі дизель отынының жоқтығын, енді бірі көліктердің уақтылы жүрмеуін алға тартты. Қоғамдық көліктерге дизель отыны жеткілікті ме? Адамдардың аялдамада ұзақ тұруына не себеп?

Orda.kz журналисі қаладағы адамдар көп жиналатын аялдамаларды аралап, мәсенің анық-қанығын біліп қайтты.

Алматы әкімдігі берген ақпаратқа сәйкес, әлеуметтік желілердегі видеода Райымбек даңғылы мен Әшімов көшесінің қиылысы, Қалқаман шағынауданындағы «7 қалалық аурухана» аялдамасы. Аялдамаға 18 қоғамдық көлік тоқтайды: №11, 14, 15, 16, 23, 26, 27, 31, 47, 67, 78, 95, 102, 112, 115, 118, 128, 202. Күнделікті 263 автобус өз кезегімен шығады екен.

«Ең қарбалас уақытта көліктердің қозғалыс кестесінің бұзылуы жол жөндеу жұмыстарының жүргізілуіне байланысты болады. Орталық диспетчерлік қызмет көлік кестеден ауытқыған кезде тасымалдаушыға хабар беріп, шара қабылдайды. Күнделікті кесте бойынша қозғалысты қадағалайды» делінген әкімдік хабарламасында.

Orda.kz журналистері жағдайды тексеру мақсатында Алматы көшелеріне шықты.

Назарбаев және Бектұров көшелерінің қиылысындағы аялдамада адамдар аз. Автобустар уақытымен келуде. Ешқандай жетіспеушілік байқалмайды.

Екінші локация – Атакент іскерлік ынтымақтастық орталығы. Бұл жақта адам көп болғанымен қоғамдық көлік желілерінің көптігінен жолаушылар легі әрдайым өзгеріп отырады. Жолаушыларды тасымалдау бойынша ешқандай кедергі жоқ.

Үшінші аялдама – Саяхат автовокзалының маңы. Бұл жердегі жолаушылардың көбісі қала сыртына қатынайтын қоғамдық көліктерді күтуде.

Қоғамдық көліктерге дизель жанармайының жетіспеуі туралы ақпаратты бірнеше жүргізушілер мен автотұрақтардан сұрап көрдік. Олардың айтуларынша, ешқандай жетіспеушілік жоқ, барлығы өз уақытымен жұмысқа шығып жатыр.