Алматы қаласында әйелдерге шеру өткізуге рұқсат берілді

Алматы әкімдігі «Әйелдердің лайықты өмірі үшін» атты шеру өткізуге рұқсат берді, деп хабарлайды Orda.kz порталы inbusiness.kz сайтына сілтеме жасап.

19 ақпан күні Алматы қаласы әкімдігіне Б.К.Шералиева атты тұлғадан 7 наурызда сағат 12:00-ден 14:00-ге дейін Махатма Ганди атындағы саябақта «Әйелдің лайықты өмірі үшін» тақырыбында шеру өткізу туралы өтініш түскен.

«Хабарлама "Қазақстан Республикасында бейбіт жиналыстарды ұйымдастыру және өткізу тәртібі туралы" заң талаптарына сәйкес келеді. Заңға сәйкес Алматы қаласы әкімдігінің 21 ақпандағы № 1/101 қаулысымен Махатма Ганди атындағы саябақта 7 наурызда сағат 12:00-ден 14:00-ге дейін митинг өткізу келісілді» деп жазылған ведомство хабарламасында.

Тілге тиек етсек, Бибінұр Шералиева есімді белсенді тұлға әлеуметтік желіде митинг өткізілетінін хабарлаған еді. Ол әкімдік митингке рұқсат еткенін мәлімдеді.

«Сіздерді 7 наурыз күні сағат 12:00-де М.Ганди саябағында өтетін іс-шараға қатысуға шақырамын. Митинг барысында қоғамдағы әйелдердің өзекті мәселелері көтеріледі. Сонымен қатар, әйелдердің лайықты өмірі үшін қажетті талаптар айтылады» деп жазды ол.