Алматы имамдары «Qurban-2021» акциясын өткізуде

Бүгін, Алматыда  «QURBAN-2021» онлайн қайырымдылық акциясы аясында құрбан шалу рәсімі басталды.  Қасиетті Құрбан айт мерекесінің алғашқы күні Алматы қаласы имамдары ҚМДБ Төрағасы, Бас мүфти Наурызбай қажы Тағанұлы игі істі бастап берді.

Елімізде жарияланған карантин режиміне байланысты биылғы Құрбан шалу рәсімі де қашықтан ұйымдастырылып, осы бағытта qurban2021.kz сайты іске қосылды.

Қашықтан онлайн құрбандық шалуға ниет білдіріп, аталған сайт арқылы мал түрін таңдап, ақшасын аударған жандардың шалған құрбандықтары, сайт арқылы өтінім берген мұқтаж отбасыларға жеткізілуде.

Рәсім аясында Алматы қаласы бойынша әзірге 180 уақ мал (қой) құрбандыққа шалынып, 600-ден астам отбасыға құрбандық еттері үлестіріліп үлгерді.   

Сондай-ақ, qurban2021.kz сайты арқылы құрбан шалуға тапсырыс берген жандарға құрбан шалу рәсімі барысынан видео есеп беріліп отырады.

Арнайы ұйымдастырылған жұмыс топтары мен  Алматы мешіттерінің барлық қызметкерлері қауіпсіздік және сақтық шараларын сақтай отырып, Құрбан айт мерекесіне өз үлестерін қосады.