Алматы халқы Талғат Мұсабаевты ақтық сапарға шығарып салды

Бүгін Алматы халқы аты аңызға айналған қазақ ғарышкері, Қазақстанның Халық қаһарманы, мемлекет қайраткері Талғат Мұсабаевты ақтық сапарға шығарып салды. Ол 4 тамыз күні 75 жасында өмірден озды.

Orda.kz тілшілері қазақтың көк туын ғарышқа көтерген азаматтың жаназасына қатысып қайтты.

Жаназа Офицерлер үйінде ұйымдастырылды. Таңертең ерте ғимаратқа Мұсабаевтың мәйітін әкелген көлік (катафалк) келіп тоқтады. Марқұммен қоштасуға туған-туыстары, жақындары, әріптестері, достары, мемлекеттік орган өкілдері, қоғам қайраткерлері, журналистер мен белсенділер жиналды.

28 гвардияшы-панфиловшылар атындағы саябақта ғарышқа үш мәрте сапарға аттанған, қазақ ғарыш ғылымының дамуына өлшеусіз үлес қосқан тұлғаға құрмет ретінде әскери жасақтар сап түзеп тұр.

Талғат Мұсабаев жайлы оның әріптесі, кеңестік және ресейлік ғарышкер Сергей Крикалёв сөз сөйледі. Ол Мұсабаевтың кәсіби шеберлігі мен сенімділігін ерекше атап өтіп, халықаралық ғарыш ынтымақтастығына қосқан үлесін жоғары бағалады.

Сонымен қатар мемлекеттік кеңесші Ерлан Қарин, Алматы қаласының әкімі Дархан Сатыбалды да Мұсабаевты шығарып салуға келді. 

Талғат Мұсабаевтың ел есінде қандай естеліктері қалғанын тілшіміздің материалынан оқыңыз.