«Алматы бас жоспары» бас директорының орынбасары сотталды

«Алматы бас жоспары» ЖШС Бас директорының орынбасары Сәкен Өмірәліұлы пара беру ісі бойынша сотталды, деп хабарлайды Orda.kz.

Антикор мәліметінше, Өмірәліұлы алаяқтық жасағаны және жер учаскесінің нысаналы мақсатын өзгертуде жергілікті кәсіпкерді заңсыз әрекетке тартқаны үшін айыпталды. Сондай-ақ, ол қалалық жер қатынастары басқармасының лауазымды тұлғасына 9,6 млн теңге көлемінде пара беруге кәсіпкерді итермелегені үшін кінәлі деп танылды.

Сот үкімімен Өмірәліұлы 3 жыл 6 ай мерзімге бас бостандығынан айырылды. Сонымен қатар, ол мемлекеттік және квазимемлекеттік сектор субъектілерінде қызмет атқару құқығынан өмір бойына айырылды.

Сот үкімі әлі заңды күшіне енген жоқ.