Алматы әуежайының жаңа терминалы жолаушыларды қабылдамай жатыр ма?

Танымал қазақстандық PR сарапшысы Әсел Қарауылова Алматы халықаралық әуежайының жақында ғана ашылған жаңа терминалы әлі жұмыс істемейтінін айтты.

«Qatar Airways біздің рейсіміз жаңа терминалдан болатыны туралы электрондық хат жіберді. Біз әуежайға асыға бардық, бірақ шындық басқа - үлкен кезек, кептеліс және басқа да әдеттегі қолайсыздықтары бар сол ескі терминал. Әдеттегідей әлі іске қосылмаған жаңа терминалдың салтанатты ашылуын өткізіп тастадық» деп жазды Қарауылова әлеуметтік желідегі парақшасында.

Ол жаңа терминалды іске қосу техникалық ақауларға байланысты болуы мүмкін екендігін айтты.

«Шамасы, тағы да «техникалық» нәрсе. Сондықтан уақытыңызды жоспарлап, ерте келіңіз, адам көп», - деп қосты сарапшы.

Алматы әуежайының баспасөз қызметі сауалымызға жаңа терминал 1 маусымнан жұмыс істей бастағанын айтты. Ведомство жаңа терминалдың жұмысына қатысты жағдайға да түсініктеме берді.

«Әуе компаниялары жолаушыларға рейстер мен хабарламалар туралы ақпарат жібереді. Осы оқиғаға қатысты түсініктеме алу үшін тікелей әуе компаниясына хабарласыңыз. Сондай-ақ, барлық халықаралық рейстерді қолданыстағы терминалдан жаңасына кезең-кезеңімен көшіру жоспарланып отырғанын хабарлаймыз. Жаңа терминалға халықаралық рейстерді толығымен ауыстыру маусым айының бірінші онкүндігінде жүзеге асырылады. Осыдан кейін ескі терминал ішкі рейстерге пайдаланылады» деп түсіндірді баспасөз қызметі.

Еске салсақ, жаңа әуежай терминалы 1 маусымда алғашқы рейстерін орындады.