Алматы әуежайында жалған Бразилия төлқұжаты бар шетелдік азамат ұсталды

Алматы халықаралық әуежайында жалған Бразилия төлқұжаты бар шетелдік ұсталды. Жалған құжатты шекарашылар анықтаған.

Ұлттық қауіпсіздік комитетінің мәліметінше, шетелдік азамат 4 сәуірде Алматы әуежайында ұсталған. Бақылау барысында ҰҚК шекара қызметінің қызметкерлері ер адамның жалған Бразилия төлқұжатын пайдаланып елге өтпек болғанын анықтады.

«Аталған азаматты жеке тінту барысында аяқ киімінің табанына жасырылған төлқұжат табылып, тәркіленді. Нәтижесінде шетел азаматы елден шығарылды» деп хабарлады Ұлттық қауіпсіздік комитеті.

Алматы халықаралық әуежайында жалған құжатпен шетелдіктердің ұсталуы бірінші рет емес. Наурыз айының басында екі заңсыз иммигрант жалған француз төлқұжатын пайдаланып Қазақстанға өтпек болған.