Алматы қаласының құрметті азаматтары марапатталды

Алматы әкімі Бақытжан Сағынтаев қала күні мерекесіне орай қаланың қалыптасуы мен дамуына үлес қосқан азаматтарды марапаттады.

Алматы күні мерекесіне орай  «Қаланың құрметті азаматы» атағы мен «Еңбегі үшін» төсбелгісін тапсыру рәсімі өтті.

Бұл туралы  Orda.kz   Алматы қаласы әкімінің баспасөз қызметіне сілтеп хабарлады.

«Қаланың құрметті азаматы» атағын алғандар ішінде Қазақстан Республикасының халық әртісі Нұрғали Нүсіпжанов та бар. Аталған марапатқа қоғам және мемлекет қайраткері Темірхан Досмұхамбетов, белгілі музыкатанушы, ҚР композиторлар одағы және Қазақстан музыка қайраткерлері одағының мүшесі Юрий Аравин, Қазақ КСР еңбек сіңірген сәулетшісі, Қазақстан сәулетшілер одағының мүшесі Тоқтар Ералиев, «Шырақ» мүгедек әйелдер қауымдастығының төрағасы Ләззат Қалтаева лайық деп танылды.

Алматы әкімі  марапат иелеріне қала тұрғындары атынан ризашылығын білдірді. 

— Сіздер бәрімізге үлгісіздер әрі жоғары марапат пен құрметке лайықсыздар. Қала тұрғындары мен өз атымнан жанқиярлық еңбек үшін ризашылығымды білдіремін, - деді Сағынтаев.

Салтанатты тапсыру  кезінде Алматы әкімі Бақытжан Сағынтаев мерекеде қаланың қалыптасуы мен дамуына ерекше үлес қосқан тұрғындардың сіңірген еңбегі назардан тыс қалмайтынын атап өтті. Әкімнің айтуынша, белгілі саяси және қоғам қайраткерлері, ғылым мен білім, медицина мен мәдениет, кино мен әдебиет саласы қызметкерлері елге қызмет етіп, мегаполистің дамуына белсенді атсалысуда.