Алматы қаласы ҰҚК департаментінің бұрынғы басшысы тергеліп жатыр - Бас прокуратура

Бас прокуратура ҰҚК-нің тағы екі қызметкеріне қатысты тергеу жүргізіп жатыр. Ақпаратты Бас прокуратура растады.

«Ұлттық қауіпсіздік органдарының қызметкерлері Н.Мәжілов пен Р.Ысқақовқа қатысты тергеу жүріп жатқанын хабарлаймыз» деді Бас прокуратура.

Сондай-ақ, Бас прокуратура «тергеу мүддесіне сай басқа да мәліметтер жария етуге жатпайды» деп қосты.

Айта кетсек, Ұлттық қауіпсіздік генерал-майоры Нұрлан Мәжілов Алматы қаласы ҰҚК департаментінің бастығы болып жұмыс істеген. Қалада дүрбелең болған кезде ол ҰҚК басшысы болған. 2022 жылдың 13 қаңтарында оның орнына Марат Ирменов келді.

Руслан Ысқақов – ҰҚК бесінші департаментінің бұрынғы басшысы. Ашық ақпарат көздеріне сүйенсек, 5-ші бөлім құқық қорғау органдарына қарсы барлаумен қамтамасыз етумен айналысады.

Руслан Ысқақов пен Нұрлан Мәжіловтың ұсталғаны туралы ақпарат алғаш рет телеграм-каналдардың бірінде пайда болды.

Бұған дейін Арнайы прокурорлар қызметінің басшысы Ризабек Ожаров ҰҚК Алматы, Алматы және Қызылорда облыстары бойынша департаменттерінің шенеуніктерін тәртіпсіздіктер кезінде әрекетсіздік танытты деп айыптаған болатын.

Еске салсақ, Кәрім Мәсімов 6 қаңтарда жаппай тәртіпсіздіктерден кейін ҚР Ұлттық қауіпсіздік комитетінің басшысы қызметінен босатылған болатын. Оның ұсталғаны туралы 8 қаңтарда белгілі болды. Сондай-ақ оның екі орынбасары – Әнуар Садықұлов («А» арнайы мақсаттағы қызметінің бастығы) мен Дәулет Ерғожин де ұсталған.