Алматы қалалық денсаулық сақтау басқармасының жаңа басшысы тағайындалды

Алматы қалалық денсаулық сақтау басқармасының жаңа басшысы лауазымы конкурсында кімнің жеңіске жеткені белгілі болды.

Бұдан былай Алматы қалалық Қоғамдық денсаулық сақтау департаментін Иран Шәметеков басқарады.  Мұндай шешімді конкурстық комиссия осы лауазымға үш үміткермен жүргізген сұхбатының қорытындысы бойынша қабылдады.

«Алматы қаласы Қоғамдық денсаулық сақтау басқармасының басшысы бос лауазымына үміткерлермен әңгімелесу қорытындысы бойынша үш үміткердің ішінен Иран Маратұлы Шаметеков жеңімпаз деп танылды. Тиісті ақпарат сайтта жарияланған. Тағайындау туралы шешімді Алматы қаласының әкімі заңда белгіленген мерзімде қабылдайды»  деп түсіндірді қалалық әкімдіктің баспасөз қызметі.

Нұр-Сұлтан қаласы әкімдігінің №3 көпсалалы қалалық балалар ауруханасының ресми сайтындағы ақпаратқа сәйкес, Иран Маратұлы Шәметеков 2000 жылы Ақтөбе мемлекеттік медицина академиясын жалпы медицина мамандығы бойынша бітірген.

2000-2001 жылдары Батыс Қазақстан медицина академиясында «хирургия» мамандығы бойынша интернатурадан өтті.

2006 жылы Д.А. Қонаев атындағы  университетте құқықтану мамандығы бойынша,  құқықтану бакалавры академиялық дәрежесіне ие болды. Қоғамдық денсаулық сақтау ғылымдарының кандидаты.

Еңбек жолын 2001 жылы Байқоңыр қалалық ауруханасының қабылдау бөлімінде хирург болып бастады. Осы жылдар ішінде Денсаулық сақтау министрлігінің әртүрлі бөлімдерінде елордалық денсаулық сақтау басқармасы бастығының орынбасары, Қызылорда облысы бойынша денсаулық сақтау басқармасының бастығы, директор, кейін ҚазММУ-де проректор қызметтерін атқарды.

2019 жылдан бастап Нұр-Сұлтан қаласы әкімдігінің №3 көпсалалы қалалық балалар ауруханасының директоры.

Еске салсақ, Нариман Табынбаев 20 маусымда Алматы денсаулық сақтау басқармасының басшысы қызметінен босатылған болатын. Оның қоғамдық денсаулық сақтау басқармасының басшысы қызметінен кетуі орталық қалалық клиникалық аурухананың бас дәрігері қызметіне ауысуымен байланыстырылды.