Алматы әкімі президент атынан әйелдерге мемлекеттік наградалар табыс етті

Алматы әкімі Ерболат Досаев 8 наурыз – Халықаралық әйелдер күні қарсаңында Мемлекет басшысының атынан мемлекеттік наградаларды салтанатты жағдайда табыс етті, деп хабарлайды Orda.kz.

Марапатталғандар тізімінде өз еңбегімен қала мен еліміздің дамуына үлес қосып жүрген алматылықтар бар.

Мемлекет басшысының Жарлығымен білім беру саласын дамытуға қосқан елеулі үлесі үшін еңбек ардагері Зайда Жайсанова «Құрмет» орденімен марапатталды. Оның кәсіби қызметі қазақ мектептерін танымал ету, неміс тілін оқыту әдістемесін жетілдіру және білім беру саласындағы халықаралық ынтымақтастықты нығайтуға қатысты.

Еңбек ардагері Татьяна Лесова да спортты дамытуға қосқан үлесі үшін «Құрмет» орденімен марапатталды. Ол жеңіл атлетикадан КСРО-ның еңбек сіңірген спорт шебері, жоғары біліктілік санаттағы жаттықтырушы, КСРО чемпионы және Олимпиада жүлдегері.

Мемлекет басшысы жариялаған «Жұмысшы мамандықтары» жылында «Ерен еңбегі үшін» медалімен «Алматыжылукоммунэнерго» ЖШС қазандық пайдалану №6 учаскесінің химиялық суды тазарту операторы Ольга Дрофа марапатталды. Ол компанияда 1996 жылдың қараша айынан бастап жұмыс істеп, әлі күнге дейін еңбек етіп жүр.  

Сондай-ақ «Ерен еңбегі үшін» медалімен «Аlmaty mai» ЖШС шикізатты қабылдау және ұн түйіршіктеу цехының бастығы Ирина Хасанова марапатталды.

«Шапағат» медалімен «Үміт саңырауларды қолдау орталығы» қоғамдық қорын 1997 жылдан бері басқарып келе жатқан Аманбике Ерғалиева марапатталды. Оның әлеуметтік салада 30 жылдан астам тәжірибесі бар.

Бұған дейін Мемлекет басшысы Қасым-Жомарт Тоқаев әйелдерді 8 наурыз мерекесімен құттықтап, Қазақстан Республикасының мемлекеттік наградаларымен марапаттау туралы Жарлыққа қол қойды.