Алматы әкімі Досаевтың жаулары неге көбейді?

Алматы әкімі Ерболат Досаев Ерменсай шағын ауданында көпқабатты тұрғын үйлердің құрылысына рұқсат бермегені үшін жауларының саны артқанын айтты, деп хабарлайды Orda.kz.

Бостандық ауданы тұрғындарымен кездесу барысында Досаев таулы аймақтарда тұрғын үй кешендерін салуға тыйым салғаны үшін көптеген қарсыластар пайда болғанын мәлімдеді.

«Белгілі бір ауданда тұрғын үй кешендерінің құрылысына мораторий енгізу заңнама бойынша қарастырылмаған. Бірақ біз бұл мәселені реттеп отырмыз. Соңғы бірнеше жылда қанша жобаны мақұлдаудан бас тартқанымызды елестете де алмайсыздар. Қалада менің таулы аймақта құрылыс жүргізуге рұқсат бермегенім үшін жауым көбейді», – деді Ерболат Досаев.

Сонымен қатар, кездесуде қала әкімі құрылысшылардың заңдағы олқылықтарды пайдаланып, жеке үйлерге арналған аймақтарда аз қабатты тұрғын үй кешендерін салып жатқанын да айтты.