Алматы әкімдігінің қызметкері бойжеткенді қорлады

Әлеуметтік желіге Алматы қалалық Жастар саясаты басқармасы бас маманының бойжеткенге дөрекі сөздер айтып, ұрып-соққаны туралы бейнеролик тарады, деп хабарлайды Orda.kz порталы.

Әкімдік оның Жастар саясаты басқармасында жұмыс істейтінін мойындады.

«Ділмұрат Омаров 2022 жылдың қараша айынан бастап Алматы қаласы жастар саясаты басқармасының бас маманы болып жұмыс істейді. Осы оқиғадан кейін ол 19 ақпаннан бастап өз еркімен жұмыстан босату туралы өтініш берді. «Мемлекеттік қызмет туралы» заңның 61-бабы 1-тармағымен Ділмұрат Омаров қызметінен босатылды», - деп жауап берді қалалық әкімдіктің баспасөз қызметі.

Бас маманның мәселесін қазір полиция қарап жатыр.

«Медеу ауданының полиция басқармасы дене жарақатын алу фактісі бойынша сот-медициналық сараптамасын жасап жатыр. Ер адам ұсталды»  деп мәлімдеді қалалық ПД баспасөз қызметі.

Ведомство мәліметіне сүйенсек, іс сотқа жіберіледі.