Алматы әкімдігінде сейсмикалық қауіпсіздік басқармасы құрылды

Алматы әкімдігінде сейсмикалық аудит және қоғамдық кеңістіктерді абаттандыру мәселелерімен айналысатын басқармалар құрылды.

Алматы қаласы мәслихаты 21 ақпанда өткен кезектен тыс XIV сессиясында қала әкімдігі құрылымында екі жаңа басқарма құруды мақұлдады. Оның бірі сейсмикалық қауіпсіздік және жұмылдыру дайындығы мәселелерімен айналысса, екіншісі қоғамдық кеңістіктерді дамытумен айналысады.

  «Бірінші бөлімнің негізгі міндеті – сейсмикалық қауіпсіздік стандарттарының сақталуын қамтамасыз ету, жер сілкінісі қаупін басқару, табиғи апаттар кезіндегі өзін-өзі ұстаудың қарапайым дағдыларына халықты оқытуды ұйымдастыру, төтенше жағдайлар департаменттерін, полицияны, қалалық қызметтерді және ұйымдарды сейсмикалық қауіпсіздік мәселелері бойынша үйлестіру» деп хабарлады Алматы әкімдігінің баспасөз қызметі.

Алматы қаласы әкімі аппаратының басшысы Бейбіт Шаханов басқарманың сейсмикалық аудитті сапалы жүргізетінін, табиғи және техногендік сипаттағы төтенше жағдайлар қаупін бақылаудың бірыңғай жүйесін құруды,  азаматтық қорғау және жұмылдыру дайындығы, сондай-ақ табиғат қорғау саласындағы мемлекеттік реттеу мәселелерін шешетінін атап өтті.

2024 жылдың соңына дейін аяқталатын кезекті аудиттің қорытындысы бойынша билік Алматыда сейсмикалық қауіпсіздікті қамтамасыз ету шараларын қолға алуды жоспарлап отыр.

Қоғамдық кеңістіктерді дамыту жөніндегі екінші бөлім басқармалар мен аудан әкімдіктерінің жұмысын үйлестіретін болады. Ол қоғамдық кеңістіктерді дамытуда, оларды жаңғырту, салу және абаттандыру тұжырымдамаларын әзірлеуде бірыңғай тәсілдердің сақталуын қадағалайтын болады.

Әкімдік жаңа басқармаларды құру штат санын көбейтуді немесе қосымша бюджеттік қаржыландыруды қажет етпейтінін, өйткені олар басқа басқармалар мен аппараттарды оңтайландыру арқылы құрылатынын баса айтты.

Қаңтар айының соңында президент Қасым-Жомарт Тоқаев Алматының сейсмикалық қауіпсіздік жүйесі мегаполисте болған жер сілкінісіне дайын емес екенін атап өтті.