Алматы әкімі 32-ші автобусты 30 минут күтті

Алматы басшысы Ерболат Досаев қоғамдық көлікпен жүріп, автобус жетіспеушілігі мәселесін өз көзімен көрді.

Бұл туралы шенеунік қаладағы Алмалы ауданының тұрғындарымен кездесуінде айтты.

— Жақында  мен қоғамдық көлікті пайдалануды шештім, халықпен бірге төменнен жоғары қарай жүріп көрдім. 32-ші автобусты 30 минут күттім, себебі сол күні төрт автобус өз бағытына шықпады. Бұл миллионнан астам қала үшін проблема. Сондықтан жақын арада 300 жаңа автобус пен 100 троллейбус сатып аламыз. Біз қаладағы қозғалысты реттейміз деп уәде беремін, - деді Досаев.

Сонымен қатар, қала басшысы бүгінде Алмалы ауданында 58,5 шақырым электр желісі ауыстырылып, ауданның биылғы жылға жоспарланған 10 тарату және 50 трансформаторлық қосалқы стансаларының барлығы жаңартылғанын айтты.

— Бұл ауданның электр желілерінің орташа тозуы 70-тен 61 пайызға дейін төмендеп кеткен. 2023 жылы тағы 97,5 шақырым желіні жаңарту және ауданның үш таратушы және 145 трансформаторлық қосалқы стансасын қайта жаңғырту жұмыстары жалғасады, - деді Ерболат Досаев.

Сонымен қатар кездесуде Тұрғыт Озал көшесінің бойындағы Абай даңғылынан Есенжанов көшесіне дейінгі су құбыры қайта жаңғыртылып, Кәрімов көшесінің бойындағы учаскедегі жұмыс 15 қарашаға дейін аяқталатыны атап өтілді.

 «Жайлы» тұрғын үй кешенінің иесіз кәріз желілері мен «Панорама» тұрғын үй кешенінің кәріздік сорғы стансасы басқаруға алынды. Досмұхамедов көшесінің бойымен Абай даңғылынан Құрманғазы көшесіне дейін және Бөгенбай батыр-Радостовец көшелері аумағында жылу жүйелері жаңартылған.