Алматы әкімдігін жөндеу жұмыстары қазанда аяқталады

Қазірдің өзінде Алматы әкімдігі ғимаратында бөлшектеу және сейсмикалық күшейту жұмыстары аяқталды, ішкі әрлеу жұмыстары жүргізілуде, инженерлік желілер тартылуда, салқындату жүйелері, көтерілген едендер орнатылуда, қасбет мәрмәр және травертинмен қапталған.

Orda.kz тілшісі ғимаратты жөндеуге қалалық әкімшілік конкурссыз 17 млрд теңге бөлгенін анықтады. 2022 жылдың 27 сәуірінде Алматы қаласының құрылыс басқармасы мен «Атрикс-Строй» ЖШС арасында жөндеу жұмыстарын жүргізуге келісім шарт жасалды. Бұл ретте мемлекеттік сатып алу порталында конкурс өткізілмей, сома бір көзден бөлінген.

Белгілі болғандай, «Атрикс-Строй» серіктестігі Алматы қаласы мәслихатының депутаты Әміржан Нәбиевке тиесілі.

Қанды қаңтарда Алматыда 62 әкімшілік ғимарат, оның ішінде мәдениет және сәулет ескерткіштері зақымданды. Orda.kz тілшісі мемлекеттік сатып алулар порталын зерттеп, оларды қалпына келтіруге нақты қанша қаражат жұмсайтынын және қайта қалпына келтірушілердің әкімдікпен байланысын анықтады.

Orda.kz сайтының мемлекеттік сатып алулар порталы ақпаратына сүйене отырып жасаған есептеулері бойынша, екі әкімдіктің (Алматы қаласы мен Алматы облысы әкімдіктерінің Талдықорғандағы ғимараттары), Алматы қалалық филиалын қалпына келтіруге шамамен 30 млрд. теңге бөлінген.