Алматы әкімдігі «Алма сити» тұрғын үй кешенінде жылудың жоқтығы туралы: ресми түрде үй пайдалануға берілген жоқ

Бұған дейін тұрғындары жылу мен басқа да инженерлік желілердің жоқтығына шағымданған «Алма сити» тұрғын үй кешені  ресми түрде пайдалануға берілген жоқ, деп хабарлайды Алматы қаласы әкімінің баспасөз қызметі.

«Бүгінде «Алма сити» Е5 тұрғын үй кешені пайдалануға берілген жоқ және ол әлі  қаланың балансына өткен жоқ. Сондай-ақ, коммуналдық қызметтердің қолы қойылған нысанның пайдалануға дайындығы туралы декларация жоқ. Пайдалануға берілмеген үйге тұрғындарды орналастыру жауапкершілігін құрылыс салушы «QazaqStroy» ЖШС компаниясы көтереді. Өз кезегінде QazaqStroy мәселені шешіп, үйлерді орталықтандырылған жылу жүйесіне тезірек қосу үшін қажетті шараларды қабылдауда» делінген жексенбі күні таратқан хабарламада.

Құрылыс салушы өз міндеттемелерін орындау үшін кепілдік хат бергені атап өтілген.

«Бұл ретте «Алматы жылу желілері» ЖШС қызметкерлері барлық техникалық құжаттаманы ұсынғаннан кейін тұрғын үйлерді тұрақты жылумен қамту мүмкіндігін бағалау үшін қайта сараптама жүргізіледі» деп қосты қала әкімдігі.

29 қазанда «Алма сити» тұрғын үй кешенінің тұрғындары президент Қасым-Жомарт Тоқаевқа хабарласып, жылусыз, ыстық сусыз, байланыссыз және интернетсіз өмір сүріп жатқандарын хабарлады.

Бұған дейін де осы тұрғын үй кешенінің тұрғындары ауыз судың жоқтығына шағымданған болатын.