Алматыға Құрбандыққа шалынатын мал кіргізілмейді

Алматыда Құрбан айтқа арналған мал әкелуді шектейтін бақылау бекеттері орнатылады.

16-22 шілде аралығында Алматыға кіре берісте қалаға мал әкелуді шектейтін бекеттер қойылатын болды. Бұл туралы Orda.kz.  Алматы әкімдігінің баспасөз қызметіне сілтеме жасап хабарлайды.

Интернет арқылы құрбандық шалуға арналған жануарларды қоспағанда, қалаға құрбандық малын әкелуге жол берілмейді.

Естеріңізге сала кетейік, Алматыда 19-22 шілде аралығында малды, оның ішінде тірі жануарларды сату үшін сою орындары мен мал базарларының жұмысына тыйым салынады. Сондай-ақ малды союға, оны автокөліктерде және жеке үй шаруашылықтарында сатуға тыйым салынады. Тек Алматы орталық мешіті анықтаған құрбандықты ғаламтор арқылы орындайтындарға ғана рұқсат.

Қаладағы күрделі санитарлық-эпидемиологиялық жағдайға байланысты қаладағы Құрбан айт мерекесін өткізуге арналған барлық іс-шаралар онлайн режимінде өтеді.

Құрбандық шалу рәсімі qurban2021.kz. веб-сайтына жіберілген өтініштер арқылы, онлайн режимде ұйымдастырылады. Алматы қаласының бас имамы Оспан Төлебидің айтуынша, құрбандық шалуға өтініштер 15-22 шілде аралығында, сағат 14.00-ге дейін қабылданады.

Құрбандыққа шалынған малдың етін мұқтаждарға тарататын адамдар қорғаныш киімдерінде  болуы тиіс. Тез бұзылатын өнімді, атап айтқанда, құрбандыққа шалынатын малдың етін тасымалдау және сақтау кезінде санитарлық-эпидемиологиялық ережелердің талаптарын қатаң сақтау міндетті.